或者好多人以為我係一個自信心爆棚覺得自己好靚好正嘅女仔。其實唔係。我知道用社會嘅標準,我係矮、肥,亦算唔得上靚,我曾經因為咁樣好自卑好羞恥,於是,我好努力去減肥節食。嗰陣我好憎我自己,日日都只係睇到自己嘅缺點。為左減肥,我折磨自己,勞役自己,餓自己,直到我瘦左10幾磅,我發現,我無變到好似廣告/ig上面嘅女神咁靚,我仍然係一個充滿瑕疵,普普通通嘅一個普通人,最悲哀嘅係,我仍然係好討厭自己嘅身體,仍然係好唔開心。

呢個時候,我先發現,原來我要學習嘅,唔係點樣去迎合別人訂落黎嘅標準,而係愛自己同欣賞自己。於是,我開始食翻甜野,食翻有味嘅野,克服食野嘅罪疚感。20歲之前,我從來未試過夠膽著背心出街(其實宜家都好淆),慢慢,我開始學習接受自己擁有一個點嘅身體,一個獨特而與生俱來嘅身體。

自從放低左對自己嘅厭惡,我個人輕鬆左好多好多,宜家我去做gym,都好清楚係為左自己嘅健康同體態,而唔係為左符合某d特定嘅標準。

無人係完美嘅,如果我地要推一個人出黎,然後由內到外攻擊佢,我肯定最完美嘅人都會有10樣或以上嘅瑕疵。我知道我係一個好唔完美嘅人,但隨住時間,我都學識鼓起勇氣去展現一個唔完美嘅自己。點解胸唔係好大,就唔可以著bikini?點解肥婆唔可以露下肉?點解手臂粗唔可以著背心?講到底,都係要過到自己個心理關口,學習愛自己多一d。而且,我根本從來就唔覺得我嘅價值係喺個外表度。

喺呢個社會,女人除左努力工作,仲比男人有多一重嘅枷鎖,就係要滿足被觀賞嘅要求。一個女性無論幾能幹,只要佢外貌不達標,佢依然會被視為無乜價值,好似,其實網絡上憎我嘅人,主要都係針對我肥同醜,或者覺得我唔知醜好乞人憎(WHICH IS TRUE in some way but BIASED in some other ways),雖然佢地無同我講過野亦唔認識我。而,我做呢d野背後嘅動機、我呢幾年來寫嘅文、我一直以黎推崇嘅價值、我真正嘅為人同性格,喺佢地眼中係不值一提的。(或者係我做得唔好啦,倡議嘅野入唔到耳/無人buy。)

一方面,呢種觀念絕對需要改變。另一方面,就讓我地從愛自己同接受自己開始,慢慢打破對自己嘅厭惡。咁樣,佢地嘅攻擊都會宣告無效。