左上：訓左4個鐘，岩岩起身，未洗頭沖涼，攰到木口木面，角度都唔理，求其影一幅相嘅我。
右上：梳洗過，略略打扮過，素顏，無戴con，無filter，高炒開心笑嘅我。
左下：遮左瑕，畫左眉，戴左con，試緊《山城角樂》d靚靚二手衫，順便開心自拍一張嘅我，無filter。
右下：遮瑕畫眉搽唇膏，戴左con，為左做《山城角樂》model而刻意擺姿勢嘅我，張相仲過埋一個美顏app。


關於外表，我想講嘅係，一個人有好多面，呢d唔同嘅面向累積、交集，先會造就一個人。

但喺社交網絡上，大家都好似喺度格鬥，鬥靚、鬥浮華、鬥開心或抑鬱，尤其是d網紅大戶，靚女model。

佢地追求美係無錯嘅，呢個只係人嘅天性，但現代資訊爆炸，呢個異常高嘅標準，加上美容化妝廣告商界嘅鼓吹同渲染、修圖，令一般嘅女仔都會比下去，甚至一路要活喺自卑、妒忌同憎恨當中。

因為呢種風氣，令到女仔走去餓自己、勞役自己、花大量時間去「修正」、「改進」自己嘅外表，甚至不惜犧牲健康同大量金錢。佢地將呢個自己擺上網，製造一個假象，然後其他女仔睇到，又無限輪迴。最後呢，搞咁多野，卻無開心到，因為我地意識唔到，我地一日唔學識接受同愛惜自己，無論自己變成點，都只會keep住唔滿意同自卑。但商人已經盤滿缽滿。

所以，我想講嘅係，要學識接受自己，一步一步黎。呢個身體，跟你一世架，無謂同佢過意唔去。（我嘅少少經歷，可以睇呢度：有試過因為減肥而折磨自己嘅，click入黎）

無論你做乜，總有d人會指指點點，多管閒事。要記住，我地生出黎唔係為左符合佢地嘅標準的。我地無義務24小時都靚一靚去please佢地嘅眼球的。我地一定有頹嘅一面，亦會有四正嘅一面，只有loser先會攞住人地醜嗰一面不斷放大，話呢個就係你嘅「真樣」，仲要漠視你外表以外嘅特質，因為除左透過貶低他人，佢地喺第二度搵唔到成功感，或者佢地根本無諗過要照顧其他人嘅感受，只係滿足自己口賤嘅慾望。當然，最重要嘅都係大家先做好自己，唔好去bully其他人。

愛我嘅人連我一起身（左上樣）都會攬實我，錫我額頭，同我講好愛我，話我好得意（eg. 娘親）。唔鍾意我嘅人，就算我𢴇得幾四正，一句說話都無同我講過，都係會無啦啦憎我 (eg. ??) 。

所以呢，學識接受自己吧，做一個舒服嘅自己，做一個為自己而活嘅人，鍾意扮靚就扮靚，鍾意頹就頹，唔好再辛苦自己去追隨嗰d由美容業、化妝業、時裝業訂落黎為左賺妳錢嘅標準啦。

ps 咪再無啦啦捧我做女神然後又話我符合唔到你地標準。我從來無諗過要做女神，從來都成日post醜/不修邊幅/求其影/素顏嘅相，加上天資所限，你地想睇外表氣質性感呢家野麻煩follow翻d model美女仲好。Please，expect我要符合你地期望做個意見同你一模一樣，又要瘦又要有身材嘅靚女麻煩block左我。