喺一班人嘅潛意識中，女人係唔應該有思想，就算有，都一定要同自己嘅價值觀一樣，唔岩聽就係雞係公廁，或者值得被大規模人身攻擊。李偲嫣好，劉慧卿好，游蕙禎好，比起男性，女性往往要額外地滿足被觀賞嘅要求，呢種要求甚至會蓋過佢地嘅思想同倡議，模糊、消解佢地嘅主張。一句女神，一句豬排，一句pure，一句雞，讚或彈都好，講緊嘅就係女人最大嘅價值止於佢嘅外貌與貞潔，而佢嘅主張彷似永遠無法喺公共領域獲得同男性同等嘅地位，或者應該話，應有嘅尊重，縱然女性已得到平等嘅教育同法律權利。透過人身攻擊或吹捧，女性嘅主張並無得到認同、反駁或者辯論，卻只有一肚悶氣。

我呢種成日貼樣貼波，尺度咁鬼大（笑出黎）嘅所謂平權L或許都真係預左比人攻擊外表，始終我透過貼波貼樣獲得某種關注，唔明白我主張嘅人，走黎攻擊我某程度上都可以話係我想要嘅效果。

但我唔係只講緊我自己，而係成個針對女性嘅風氣。喺公共領域，一個女人唔可以年輕，唔可以老，唔可以醜，唔可以靚。社會assume，一個女人有性吸引力，就一定係靠樣上位，唔光彩；但如果一個女人無性吸引力，sorry佢連女人唯一嘅價值都無埋，可以丟去堆填區。喺私人領域，#搏乜 呢一個想法背後嘅邏輯，係assume 緊女人係一件無時無刻都想sell自己出去嘅商品，幾時都想有某種企圖。意味著，女人作為個體係唔重要的，佢必定要努力將自己銷出去，佢嘅身分永遠建構於對他人嘅從屬：做一個恰當嘅女兒、妻子、女朋友etc，而唔係鮮明獨特嘅個體。其實，女人真係唔需要為左他人而活的，著貼身衫出街、著sports bra做運動，好有自信咁表現whoever she is，其實佢可以只係舒舒服服地做緊自己而已，唔關其他人事吧？