講到打壓女性，最不遺餘力嘅人一定係女人自己。

由細到大，香港人教導小孩「尊重」，通常都係圍繞尊敬老師、長輩等，換然之係教你服從權威，而好少會教你尊重別人嘅選擇同自由，欣賞每個個體嘅優美同獨特之處。由幼兒班開始，自由嘅存在意義就係要被剝奪，如果你不以權威訂下嘅標準（唔嘈、聽話、專心）去表達自己，就係你嘅錯，或者，你必定係另有企圖，例如要博取注意。

喺呢個崇尚權威而唔尊重個人選擇嘅社會，展現個人風格或者表現自我，會被當成一個死罪：「博取注意」、「博上位」、「唔合群」。社會有一群人，從來未學識尊重其他人嘅選擇，而會強逼你融入佢地，變得同佢地一樣唯唯諾諾，毫無個人特色。 雖然，到你嘅稜角磨蝕曬，佢地又會睇唔起你，因為，佢地其實被教育到從心底裏好睇唔起自己。

講到女性表達自己嘅權利，最反對女性自由表達自己嘅，一定係女性。 如果一個靚女今日化濃妝，邊個會對佢產生敵意？如果一個女仔著低胸衫，邊個會鬧得佢最勁？如果一個女仔去整容，邊個會最不滿？就係女人本身。因為女人由細到大被教育，不能以某些方式（例如性感、狂野、熱情、自信）表達自己，而必須要端莊、斯文、矜持、謙卑。

當有d女性見到別的女性衝破左呢個框框，用另一種方式表達自己，佢地就會覺得係嗰個女性嘅錯，或者佢必定係另有企圖，例如要博取注意，或者佢係做雞嘅，其實，佢可能只係做緊自己，何錯之有？就算有其他原因，又與你何干？假如該女性因著「離經叛道」而獲得某d好處，例如讚美，出於競爭嘅心態，女人肯定比男人更賣力去批鬥佢，「自己無，人地都唔可以有」，就係咁變態。

點解我要口誅筆伐呢種狹隘嘅世界觀／是非觀？因為我相信，一個尊重他人選擇同自由嘅社會，比起一個要求每個人變得一樣嘅社會，更加能夠為集體帶來愉快嘅生活。今日你批鬥人地露長腿，他日人地批鬥你著背心，有咩意思呢？標準誰來定呢？所以我地要努力捍衛其他人嘅自由，就係等於保護自己，其實就係咁簡單。