一年前，我會覺得攞隻狗去絕育好有問題好自私，好似以高高在上嘅姿態，剝奪左動物基本嘅權利咁。

半年前嘅我係咁寫：

今日喺校園見到一張宣揚替動物絕育嘅海報，列出絕育嘅好處，包括防止癌症、令動物無咁嘈、減低其攻擊性、減少野生或流浪動物數量等。

講真丫，人類都會生癌，人類都會發情，都會暴力，都會好嘈好嘈，而且人口仲不斷增多，甚至係破壞環境嘅始作俑者，不如人類全部都絕育啦？

我地高傲咁預設左人類統領世界，人類係「當家」，動物就係「野生、流浪」，但其實我地人類係咩姐？面對大自然都係一樣卑微。所謂「幫助d動物」，不過係方便人類生活，而自私地操控其他物種而已，唔好講到人類真係為左d動物好，我覺得好噁心。如果真係為動物好，最好就係人類滅亡。

自從有左Costa之後，我先發現幫寵物絕育係幾咁必須。

得罪講句，香港社會連人都無空間生存，何況係狗？Costa正正係被遺棄嘅一胎八隻狗其中一隻，其餘七隻，凶多吉少。喺不適合動物生存嘅城市嘅環境，貓狗如果搵唔到人收養，好彩嘅就流浪，獨自面對飢餓、各種嘅疾病同危險。週不時，都會有流浪貓狗比車車到殘廢、或者因衛生惡劣而成身爛曬、眼都盲埋，或者餓到皮包骨。呢d已經係好彩。唔好彩嘅，隨時一胎貓狗比人丟落河活活淹死、埋喺泥下面焗死，或者直接攞去人道毀滅，甚至比d變態佬攞去虐待。如果唔鼓勵幫動物節育，不斷等佢地生更多後代出黎，只係令更多動物受苦，亦令更多有心人受苦，因為照顧流浪/被遺棄嘅動物，絕對唔係容易同便宜嘅事。

就算動物比人收養到，好似Costa咁，老實講，香港有幾多空間同自由比到佢？論活動空間，香港周圍嘅公園、餐廳、商場都唔比狗入，公共交通工具唔歡迎你，屋企又唔會夠地方比佢伸展。如果養嘅狗種係需要大活動量，例如邊界牧羊犬，人地原本係喺無邊無際嘅草原趕羊，喺香港就變左草都無條，跑都無得跑。論心理健康，就算有心，一個主人都未必日日陪伴、訓練寵物。就當主人每日抽到4個鐘陪寵物，咁計落佢狗生有 5/6 時間係喺等待同寂寞之中渡過。

係咁嘅生存狀態下，唔好令更多無辜嘅生命出黎受害，先係負責任嘅人類。試想像下，如果Costa無啦啦生左8隻Bb出黎，我可以點？我根本無能力照顧佢地，而搵到人領養唔係必然嘅，搵唔到，或者最後都要送佢地去d唔知咩地方。成日話領養代替購買，唔係話要將買寵物嘅人用道德高地打到體無完膚，更莫講繁殖場如何黑暗殘酷，而係希望呼籲翻，香港社會真係唔需要人製造更多寵物，除非你有錢有地方到可以養到100隻狗而比到幸福生活佢地。

 

無辦法，喺人類當道嘅社會，動物好多權利，真係無好過有。你又無得話剷除人類喎。拿，咁啦，如果要咁偉大講寵物／動物生殖權，好簡單，一係你每個月比翻幾十萬出黎照顧d流浪、初生動物，並無限地照顧佢地無限嘅後代囉～