關於男女情慾。社會assume左男人有旺盛嘅情慾係正常不過,「邊有男人唔鹹濕架~」因此,男人鹹濕係正常嘅,社會亦會理解同cater佢地嘅需要,推多一步,如果男人無情慾,或者缺乏性經驗,甚至會比朋友取笑。

女人呢?社會係唔承認女人有情慾的,唔會鼓勵女人探索自己嘅身體。只要女人稍微展示一點慾望,或者唔想以「純潔」嘅形象示人,佢就係雞係公廁,係淫娃係蕩婦係不雅,而呢d標籤全部都係負面的,絕對唔係「邊有女人唔淫蕩架~」咁平常不過。因此,女人嘅情慾係長久以來被壓抑、忽略、污名化的。女人必須要被動、無知、欲拒還迎,否則,佢就無價值,或者不值得獲得尊重。

呢d嘅壓逼嘅存在並非不合理的,可能有歷史因素(例如女人以前無經濟能力要靠男人、係男人財物etc),亦有生理因素(男人可以周圍播種無乜reporduction cost,但女人就要小心謹慎因為一懷孕就要負嚴重後果左etc)。但現今香港社會,我地著重個人權益(好似係),女人亦有平等嘅經濟能力,同男人一樣要扛起平等嘅公民責任同義務,但點解風氣卻無改呢?另外,避孕、防止性病等等嘅技術亦非常完善,繼續單向地抑壓女性嘅情慾,assume女性要貞潔無性慾,從而限制佢地交友嘅自由、選擇lifestyle嘅自由、表達自己嘅自由,絕對係守舊而無謂的。