話說全世界仲有超過30個國家會對女性進行割禮。

 

聯合國2016年估計，全球起碼有2億女性進行左不同類型嘅割禮，包括完全割去陰蒂、小陰唇、縫合大陰唇等等。割禮嘅實際效果，就係減少女性性慾，同埋令女性陰部更「美麗」，但卻被證實毫無健康益處。進行割禮除左充滿感染等風險，研究更顯示，割禮後嘅女性比一般女性有多一倍機會感到無性慾，52%會於性行為時感到痛楚，但喺好多地方，仍然係只有進行左割禮嘅女性先嫁得出，先有社會價值。


喺香港，我地唔需要承受呢d酷刑同暴力，但係，原來都有好多美容公司（特別係中國嗰d）會宣傳一d陰部整形手術，喺無醫療需要嘅前提下，以手術縮細陰道、切去小陰唇以令陰唇外觀更「美」、處女膜重整、漂白等等。就算平時睇開嘅AV女優，原來不少都有進行過陰部手術，整「靚」個形。呢一系列嘅手術，無他，就係為左取悅男人。

其實，女性黎講，真係健康就可以。追求美係正常，但女性真係唔需要為左男人嘅胃口同幻想去虐待自己嘅身體。我地香港雖然無割禮嘅傳統，但假如我地只顧壓抑女性嘅性自主，甚至有一種要求女性符合男性胃口同期望嘅風氣，其實我地只係五十步笑人一百步而已。