香港人係世界上最聰明，但又最唔開心嘅民族。

一出世，我地就被訓練成工作機器。比較聰明嘅人去從商，或成為專業人士，剝削一般大眾。

比較一般而且求安穩、奴性最重嘅人會去做官，再剪斷香港人創意同夢想嘅翅膀，要我地每一個人都成為社會嘅奴隸，按住社會嘅標準出生工作退休死去。

我地為權貴日以繼夜咁工作，換取金錢，再轉個身將份糧送翻比權貴，向佢地交租或購買各種「必需品」，成件事根本係一個局。

津巴布韋嘅朋友同我講，佢地95%人失業，但佢地好開心。我地96%人工作，生活亦算富裕，但我地好唔開心，小學生都要諗點自殺。喺香港，唔將畢生時間貢獻工作，彷彿係一種罪，會受白眼甚至歧視，呢點令佢覺得同情又可笑。

我想講嘅係，香港人，我地好多野以為自己無得揀，其實係有的，差在你敢唔敢走一條唔同嘅路，有無勇氣面對非一般嘅挫折。津巴布韋嘅朋友喺無機票、無簽證嘅情況下，由香港飛左去日本旅行。好多時，佢唔需要用金錢就可以喺香港換取食物同衣物。屋企唔需要多物品，只有絡繹不絕嘅客人甚至陌生人到訪、留宿。姐係話，即使喺香港，我地都可以選擇一種不需要被金錢、工作綑綁嘅生活方式的。

喺佢身上，我發現原來香港可以咁唔同。我相信，我地絕對可以令香港更好的。而「好」，唔係講緊「發展經濟」或者起幾多條跑道或高鐵。全部唔重要的。我地需要嘅，係令呢個城市嘅人開心，而開心同經濟發展無乜關係的。

要我地開心，除左要重新建立關愛嘅社區，保護翻我地嘅文化同應有嘅自由，亦要比香港人見到希望，要比佢地知道，唔需要懼怕走不同嘅路。