有時候睇一d有關罪案和法庭的新聞，提到疑犯脫罪、獲得上訴機會等，總有不少人會留言話法治已死、無公義、「點解咁都可以告唔入」，並且得到上千人按讚認同。

但其實，疑犯脫罪正正彰顯了香港的法治和對人權的保障，不會胡亂剝奪人民嘅自由。

比如說，最近有南亞裔疑犯被控傷人，但證據不足（證人口供不一、無法確認影片中人身分等），案情有合理疑點，成功脫罪乃合情合理。如果證據不足、證人口供有矛盾，亦能入罪，那才是一個不公義的人治法庭。

又例如，一個新移民近日得到上訴機會，重審謀殺案，原因是法官誤導了陪審團，有關疑犯憤怒的情緒對案情的重要性。

好多人留言，「原來嬲就可以殺人！無天理！」睇到呢d見解，真係好無奈。

謀殺係指有預謀地非法殺害他人，但如果被告因被「激怒 (provoked)至喪失自我控制」而犯案，根據香港法例339章第4條同普通法，的確是可以由謀殺下降為誤殺的，對刑期也有影響。再者，「激怒」在法律上的定義和舉證要求是十分複雜嚴謹的，不是單純的「好嬲」就可以了事。重審，並唔代表「嬲就可以殺人」，而係維持整個司法制度嘅一貫性，依法審案，保護每一個市民。

我地只係人，唔係神，我地永遠唔知疑犯有無真係犯案，唔可以「覺得佢有罪」就定罪，一定要依足程序、交足證據、跟足法律去判案，先盡可能地達致到公義，呢點亦係法治精神重要嘅一環。

蘋果日報、東方日報呢d，特別中意加d標籤落新聞度，強調咩「南亞裔」、「新移民」、「本土派」，對案情繪形繪色，想讀者一見到就鬧。我認為，盡責嘅傳媒可以少d激起普通市民嘅情緒同分歧，多d解釋翻個事實同個制度嘅意義。