咁耐以黎，我一直期望拓闊香港讀者嘅審美觀，宣揚不同體態都有不同的美，有著不同身材外貌的人，也應該擁有以不同方式展示、表達自己嘅權利。所以，我一直好欣賞嗰d身材不完美但仍然充滿自信同力量去展示自己嘅activist，並視佢地為榜樣，跟貼佢地嘅動態（另一個我跟開嘅activist都好特別，可以喺呢度睇：沒有乳頭的女人，原來連裸露嘅資格都失去？）。
直到我見到，一d癡肥嘅人士用同一套理論，去宣揚完全不健康嘅癡肥體態。我先發現，原來我並非我想像中咁liberal：原來，我都會認為有一d人喺宣揚身體自主嘅時候係gone too far。
以上係我即時嘅觀感。
其中一個我第一眼認為 “gone too far”嘅身體自主倡議者。 佢ig: @chooselifewarrior
再諗深一層，同埋睇多左佢嘅主張，我又有唔同想法。其實我係非常同意，即使係癡肥嘅人，都應該要活得開心、自信。癡肥，只係佢眾多嘅特質中，一個較明顯嘅特徵，並不應該被壓倒性地視為佢人生嘅全部。就算佢需要減肥，都唔代表要不斷討厭自己（雖則，厭惡同自卑可以係好大嘅推動力）。所以，我不會否定佢嘅行動，為佢自己所能夠帶來嘅empowerment。
然而，當佢將呢種觀念帶到公共領域去辯論、傳揚，佢必須要應對公眾嘅憂慮與觀感。面對有理有節嘅質詢，佢唔能夠單純地反駁話「呢個係我表達自己嘅自由，他人無權過問」。
公眾之所以對肥胖反感，根源可能係基於健康問題，然後延伸到社會及醫療資源嘅分配。呢點絕對legit，所以人對肥反感並非完全無理的。然而，我認為我地都不能否定，時裝、模特兒、演藝界，一直以來強勢地宣揚嘅標準，都係同樣地會引致嚴重嘅健康問題。基本上，沒有一個女明星不是過瘦嘅，過瘦除左會令身體機能出事，精神健康亦可能有影響。如果社會歧視肥胖人士，係基於健康問題，卻對過瘦嘅健康問題視而不見，甚至將過瘦推崇為美麗、活力、可取，呢個絕對係講不過去。如果要從健康角度出發，卻大規模地只針對肥胖人士，呢個唔係叫關心健康，而係徹徹底底嘅歧視。
我認為，雖然有標準參考，但身形去到點，先為之不健康，界線係好模糊嘅，好睇每個人嘅身體狀況。況且，現代人嘅健康與不健康，亦唔係單從身型或外觀就能睇得出：除左隱性嘅毛病，仲有精神健康等睇唔出嘅健康狀況。又，有幾多人喺取笑、謾罵、歧視肥胖人士嘅時候，係真係出於關心而非嘴賤呢？
極端身型，無論肥瘦，都唔應該推崇。但喺呢個嚴重傾斜歧視肥人嘅社會，或許推崇（所謂推崇，只係呼籲人地唔好歧視，同埋呼籲肥人唔需要憎恨自己而已）一下癡肥，都只不過係剛剛好能夠勉強抗衡主流價值而已？
當然，最後都不能夠離地到忽略個別社會嘅特質。例如香港，地少人多、人煙稠密，肥人佔嘅位置較多，真係會阻礙他人，逼個地鐵都難d，呢d種種，亦可能係肥人被歧視嘅原因之一。你有壓力，我有壓力，要香港人共融同互相尊重，少d欺凌同標籤人，又有無可能呢？ 呢方面，可以參考下延伸閱讀嗰兩篇～
延伸閱讀：
Emilia's Gender Blog 