PTGF?咪又係雞!

喂呀哥,其實真係有好多PTGF堅持自己唔係雞咩?

PTGF,全寫係Part Time Girl Friend,亦可以叫做援助交際,簡稱「援交」。

拿,我自己就其實已經將PTGF同雞畫上等號,因為好多時,PTGF都係有性交、口交等嘅服務。係雞定PTGF,都係一個稱呼姐,唔需要覺得人地要扮清高,就起勢攻擊㗎喎。不過,注意翻,其實有好多ptgf都唔提供性服務嘅,只係約會、食飯、睇戲,過界d嘅最多會摸摸,咁嗰d又可唔可以堅稱自己唔係雞呢?我就覺得賣親密關係、賣情感、少許身體接觸,都可以算係半個sex work,但呢個情況係有爭議嘅,唔係一句「咪又係雞」就可以概括,遲下有機會嘅論述下。

同埋,邊個會喺網上message/ig tag嗰d大大聲宣佈自己係雞?呢個唔係承認與否嘅問題,而係潛在嘅法律風險,所以稱自己做 #ptgf 而唔係 #賣淫 #叫雞click呢度 ,唔等於唔承認自己係雞架喎。

第三,名稱呢d嘢係互動嘅,一個好聽d嘅名,其實唔單單係ptgf 攞緊貞節牌坊,同時都會令嫖客(佢地叫自己師兄/哥哥啦)好受d,雙向嘅。舉個例,明明係雞肉蛋漢堡,但麥當勞要叫佢做「東京之夜」,佢又賣得多d,客又食得開心d,marketing黎姐,一個叫法黎姐,沒有對錯㗎喎,無乜嘢值得鬧。

就算係鬧,應該要鬧埋嫖客矯揉造作嘛,叫自己做師兄,叫肉金做家用,(我從未聽過人鬧男人「又要叫雞又要攞貞節牌坊」),只係鬧ptgf一方係唔合理㗎喎。唔知點解,一講到性交易,d人就自自然然會鬧妓而好少鬧嫖客。(其他文章有講下呢樣嘢。)

PTGF,或者援交啦,同一樓一有咩唔同呢?我諗,援交或多或少同個客調下情,賣「戀愛嘅感覺」、「陪伴嘅溫暖」,而唔單止要滿足到性慾。好多援交plan,係俾個膊頭你、陪你食飯傾計、比關懷你、拖下手仔,唔完全係賣性。當然,現代社會,連人與人之間嘅關懷都可以攞黎賣,係悲哀嘅,但唔可恥唔可惡。

至於所謂師兄,都只不過係正常人,同樣無乜嘢可恥的。正如去按摩做spa,係用錢買身心嘅鬆弛;去聽演唱會,買到靈魂嘅觸動同共鳴。或者,去搵援交都不過係用錢安撫一下個心靈而已,同聽演唱會、做spa係無乜分別的。呢個世界平庸又寂寞嘅人多不勝數,你情我願,一刻嘅擁抱、幾句溫柔嘅說話,或者係好多人走下去嘅動力呢。同樣平庸又寂寞嘅普通人,同樣有唔想見光嘅秘密嘅人,又憑乜嘢去judge師兄/ptgf呢?

最後啦,PTGF又唔係你女友又唔係你女兒(就算係都唔代表你有權管曬啊~),人地承唔承認自己係雞關你鬼事咩,幾時到你大義凜然 LOL 逼人「認」自己係雞除左滿足自己侮辱人、睇人pk嘅快感,仲有咩作為?