成日聽到人講:「如果你xxx一點,就完美啦。」

例子:如果你瘦d、高d、後生d、大波d、可愛d、溫柔d,etcetc..,咁就完美啦。

雖然呢類說話,叫做係半個讚美,意思係「除左呢一樣野,你都好好。」身經百戰嘅我當然唔會放在眼內,聽完唔會好offended或者好受創,我亦理解評論者並無心傷害任何人。但,好多對自我形象好掙扎嘅人比人一咁講,心情真係好矛盾,因為評論者係善意嘅,而且有讚有踩,好似好為你著想咁。

呢種善意嘅評論,會令佢地覺得自己永遠未夠好,嚴重嘅,可能會受到好大嘅情緒困擾,甚至去傷害自己。

其實,就算我瘦多十磅,仍然會有人評論我未夠瘦。或者,到時又會有另一班人,評論我完全失去曲線。

結論是,你永遠無法滿足所有人。呢一輯照片入面嘅人形 mannequin ,就好似社會嘅標準,逼住人去追隨。但係,原來每個人都係拎住唔同嘅mannequin,再去套落其他人身上。即使有一日,你變到好似舊膠咁完美,都總會有人詆毁你。

所以,一方面我哋要學習欣賞自己,唔好理其他人嘅目光。另一方面,我哋都有可能成為評論者。而我哋要學習嘅係擁抱不同嘅美,欣賞不同嘅體態。最重要嘅係,唔好單單用自己嘅標準去審判、規範其他人。