其實，點解女人要討好一個唔存在嘅對象？

我時常聽到一類意見，大概就係：「Emilia 影埋d咁嘅相，宣揚埋d咁大膽出位嘅理念，佢男朋友唔介意咩？佢對得住第二時老公咩？」次次聽到呢度，都覺得一額汗。

呢類意見，有兩個我不太認同嘅假設：
1. 女人嘅身體必須要向自己嘅對象（常為男性）負責，而呢個對象甚至唔需要存在，只需要係「未來嘅一個人」，一個虛構嘅形象。
2. 所有男人都唔鍾意伴侶暴露於人前/性感地展示自己。

回應（1）: 其實香港嘅發展同經濟，已經比最發達嘅國家有過之而無不及，何解喺意識形態上，仍然會如此落後地覺得「女性係男性嘅附屬品」？

君不見一個男人，自主地運用佢嘅身體時，會同女人一樣，四方八面地受到同等面向同程度嘅壓力。舉個例，男人去買春，佢身邊d朋友會否質問佢「對唔對得住未來老婆」之類？可能都會，但更多嘅係會係用「十個男人九個滾」呢類說話幫佢地開脫，男人亦多數會幫翻男人。（利申，喺無背叛伴侶嘅情況下，唔覺得男人買春有問題，之前都講過。）

但女人呢？佢地去賣春、買春，甚至只係影下性感相，或者平日衣著暴露少少，好多人已經會覺得佢呢一世玩完了，而且不論男女都樂於圍剿她。

男人好，女人好，大家都係人，都有個人嘅意願，有選擇適合自己嘅生活方式嘅自由。喺無傷害其他人，無背叛到任何人嘅情況下，點解自主地運用自己嘅身體，都要承受排山倒海壓力？雖則話自由可能有代價，但點解喺香港想要自由，可能仲要比落後過我地嘅地方，來得更難？或者，香港人都太壓抑了，容不下他人活得比佢自在。大家一齊自由，大家一齊尊重他人嘅自由，唔係更美好咩？

回應（2）: 咁如果男人係鍾意自己女人俾人輪姦呢？女人又要照做？

呢段會輕鬆d。其實，其實好多男人都有暴露女伴嘅喜好，隨便搵搵，網上都有上千個「Cuckold（戴綠帽）」嘅AV網站，上百萬條影片同圖片，各類Cuckold嘅AV題材應有盡有，包括一路打電話比老公一路與另一個男人上床，包括綁住男友要佢睇女友同另一人廝混，包括要女朋友喺公眾場合露出。

重點黎啦，如果按照假設（1），一個女性嘅身體，必須要根據男人嘅喜好去運用，咁如果我嘅伴侶係好鍾意我露出，我係咪又有責任、是必要露出比人睇曬？如果我嘅伴侶，想睇我同另一人做愛，邊做邊比幾十人圍觀，我係咪又有責任，事必要將自己嘅身體，無啦啦交比一群我唔認識嘅男人？

講到呢度，或者你會發現，「身體自主」其實真係常識。身體自主並唔係叫你去暴露，去叫雞，去做雞。身體自主唔係一個行為，而係一個思考模式，推動人去按自己嘅意願，大程度上自由地運用自己嘅身體（犯法係另一個議題，暫不作討論），無論係開放定保守嘅方向都應受到尊重。