性,係人嘅基本需要,同食飯一樣。無性,你同我都唔會存在,人類都會滅亡。君不見有人會因為「感到肚餓」而羞恥,但講到解決性慾同性需要,好多人都會羞於啟齒、唔敢面對,更多人會選擇去否定性慾,甚至打壓性慾。但其實,性只係普通不過嘅事,只要無犯法無傷害他人,根本唔需要用有色眼鏡去論斷各種釋放性慾嘅人類(包括去叫雞、去做雞、自慰、睇AV、拍AV、拍寫真、追𡃁模、尋SP、有各種性癖、濫交之類;當然,呢d行為各自會衍生其他問題,暫時不作討論,只針對有d人單純因為呢d行為同「性」有關就盲目反對。)

因此,我從來唔會對男朋友睇AV、J其他女仔之類反感,唔係我男朋友嘅人我更加無資格理。作為女仔,根本唔應該用有色眼鏡去看待男人嘅情慾。生理上,大部分男人嘅性慾的確會比大部分女人旺盛(呢點可能controversial,但講住先),女人應該嘗試去了解,而唔係用「死淫蟲」、「咸濕佬」呢類負面標籤黎攻擊用合法途徑宣洩慾望嘅男人。當然,男人都要去了解女人啦,兩性平等嘛,不過呢個後話。

Pornhub數據顯示,原來香港男人上網睇AV係全球第三多。我對呢個數據唔驚訝,畢竟香港上網嘅方便度、速度係全球數一數二,而且香港土地問題嚴重,好多人根本都係性壓抑。睇AV放鬆真係正常合理不過。(其實女人都會睇的科科)

不過,既然大家都喺度睇AV,點解又要去攻擊、睇唔起拍AV嘅演員呢?上幾篇文都有提及過AV男女優嘅辛酸,佢地無偷無搶無傷害任何人,都係一份工搵兩餐姐,有咩必要用有色眼鏡去睇佢地呢?(當然,好多人歧視性工作者係有其他交疊嘅因素,包括貧窮、犯罪、教育水平等,不過呢個都係後話,有好多人係單純歧視。)批評港女去拍AV「影響香港形象」嗰d男人,真係虛偽又無聊,唔係你地成日睇,會有market咩?有需要嘅又係你地,製造個市場嘅又係你地,有人出黎滿足你地需要,又要企喺道德高地扮清高,真係精神分裂呢!

之前睇紀錄片《After Porn Ends》,講述退休AV演員嘅生活。佢地好多人去到邊都被認出,搞到被排擠。最搞笑係,有家長認出退休演員,然後要求校長唔比演員嘅細路喺度讀書。咁偽善都有嘅?你認得,姐係你有睇啦!又要睇又要鄙視,將社會對自己嘅壓抑、自己所感到嘅羞恥感,轉化爲攻擊去搞d滿足你需要嘅工作者,都真係幾wrong。

或者人類就係咁,一方面好渴望釋放人性,一方面又礙於社會禮教、不斷抑壓人性,順便幫手抑壓埋其他人嘅人性。其實大家都enjoy yourself,只要唔好傷害到無辜嘅人(強姦、非禮之類),勇於面對自己同別人嘅人性同慾望,或者大家都會過得輕鬆d。

精神分裂Emilia 出現了,可參考: 做雞點解唔道德?女人喜歡性點解係不能接受?