可能因為我地呢班傻人日講夜講嘅關係，我開始見到「身體自主」呢類tag喺大家嘅日常對話之中出現。咁樣絕對係好事。

然而，我見大家似乎有所誤會，認為「身體自主」等於倡議個體衣著暴露、開放性觀念，諸如此類。但其實，「自主」嘅意思，係倡議人有掌控自己嘅身體嘅權利，儘量克服社會或身邊人嘅壓力同規範，自由地運用身體同表達自己。姐係話，「身體自主」係尊重任何人以不同方式，包括保守嘅方式，去運用自己嘅身體。（犯法同影響到他人嘅方式，例如公眾場合露械，係另一個議題，暫不作討論。）

打個比喻，假如一個人經已40歲，仍然係處子之身，呢個社會會認定佢係一個缺乏吸引力嘅失敗者，呢個時候，佢可能會因為壓力而就範，喺朋友慫恿下，求其搵個人赴巫山，但其實佢心底入面始終好不安同不情願。雖然佢由所謂保守，變得比較開放，但由於佢破處嘅決定係基於壓力，亦不完全情願，所以呢個情況下佢並無自主。反而保持保守嘅狀態，先係佢嘅意願同自主。

又以外國一d教會學校爲例，佢地會要求學生簽下一d合同，叫Virginity pledge，要求d十歲樓下嘅孩童承諾唔會喺結婚之前破處。根據合同，佢地嘅身體係屬於教會同神嘅，要爲神好好珍存。呢個情況同第一個例子好似，但又好唔同。第一個例子，係一個成人自主地希望留住處子之身，而呢個例子，係社會權貴利用制度，去逼使未成年嘅細路（未成年因此沒有能力consent，而且教會亦會使用其他方式控制孩童）去放棄自己身體嘅自主權。呢個情況下，保留童貞嘅決定，就不能說成係自主。

有人係逼不得已，走投無路，所以去從事性工作。佢地無辦法不出賣自己嘅肉體，甚至淪為人口販子嘅搖錢樹。呢d性工作者並得不到身體自主。但有一d人，純粹因為貪圖快錢、享受性愛、喜歡自由之類，而選擇去做雞鴨鵝，拋開社會對性工作者嘅歧視，收放自如。好大程度上，呢類人係獲得身體自主嘅。

因此，最終無論如何保守或開放都好，其實都唔係重點。重點係，你是否完全自願地去作出呢d決定，係咪有充足嘅渠道，去明白作出呢類決定嘅風險同得著，有否受到社會、家庭、朋友、權貴嘅壓力，有無違背自己嘅喜惡。

身體自主唔係叫人去做雞，叫人去剝衫；亦唔係叫人去守貞、去包頭。而係，希望每個人都可以不受壓力去做自己，亦希望每個人都可以尊重其他人嘅自由，少d批判攻擊，多d了解欣賞。