一路以來，我嘅訊息有兩個：

（一）任何人，都有以不同方式表達自己嘅自由，不論佢地嘅外表體型如何。每個人都有愛自己身體嘅理由。

（二）延伸第一點，女性應有權展示佢地嘅情慾，並同樣地得到尊重。女性情慾應被正視、討論，唔應該被視為禁忌或污穢。

 
咁問題黎啦，究竟比咁多網民公認為係肥醜嘅我（早期有上高登睇人點片我），勇於展示自己嘅身體，然後居然獲得人讚美我嘅身體（而唔係我醜都有勇氣咁做），究竟我係成功定唔成功？一方面，我可能成功拓闊左人嘅審美觀，咁我算係成功。

另一方面，如果原來好多人根本本身就唔覺得我係肥醜，咁件事就無咁make sense，好似變左純show off。當然，純show off係無乜問題，因為都係自由、自主嘅一部分黎。

 

所以，其實都有少少矛盾。每次聽到人讚我身體，我都會覺得有dd不安，因為彷彿我會失去資格去倡議body positivity（其實唔會啦）。 不過，一日有人覺得佢自己好醜好唔靚，討厭自己嘅身體並害怕去表達自己，我就有繼續做呢d嘢嘅理由。我想話俾受緊社會規範嘅折磨嘅人聽，其實你地都可以活得好carefree。
At the end of the day，都係嗰句，人地點睇自己唔係最重要，最緊要係自己愛自己嘅身體。所以間唔中，我都會up d 展示到自己「缺點」嘅相，希望傳達翻一個message：腩肉、byebye肉、粗腿、平胸、矮、橙皮紋、皺紋、斑、皮包骨、whatever your insecurities are，呢d 全部都唔係阻止到你用不同方式表達自己、令自己開心嘅「缺點」，佢地只係你身體嘅一部分，係正常不過而且好可愛嘅特徵。