有個問題想請教下各位sensei: 點解一個人喜歡小朋友，然後走去做老師/校長/保姆/校工，你唔會認為佢利用興趣賺錢有問題；一個人喜歡下廚，你唔會認為佢去做廚師有問題；但一個人如果喜歡性、喜歡拍性感照，佢收錢去合法地實踐佢嘅興趣（賣春、賣相），就突然變得好有問題，毫無道德？雖然我個人嘅立場係比較liberal，但我都大概想到幾個販賣性感/性，會為社會帶黎嘅問題。

(之前用不同角度寫過性工作點解無問題，可參考：睇AV唔可恥，拍AV都唔可恥 ，PTGF？做得雞就咪攞貞節牌坊！，賣子宮到底有咩錯？－－簡評援交)
破壞社會穩定

傳統黎講，性並唔係用黎滿足個體嘅愉悅，而係單單用黎繁衍後代，以鞏固社會嘅權力、家庭結構。婚姻與性，往往被視為寶貴嘅資源，可以用黎邦交結盟、或攀附權貴、或壯大整個家族。

現代黎講，就算婚姻同性都隨住價值觀嘅改變，而衍生左與以往不同嘅意義，但「性」仍然被視為資源，特別係用作維持家庭結構嘅穩定：老婆可以用性、用仔女黎留住老公；女朋友可以用性黎引誘男方付出、同佢結婚；男性可以用性黎為自己家族留後、傳宗接代、滿足長輩，下刪萬個功能。

喺呢個框架下，一個對社會成本效益與家庭結構最有利嘅做法，就係沒有任何女性販賣性感、每個女性都冰清玉潔來者必拒，只為丈夫獻身。當性嘅選擇只有妻子一人，咁所有男性，都只能為左獲得性資源，而必須全力為家庭付出，進行「有意義」（家庭中）嘅性行為。無女人免費提供/販賣性感，男人嘅資源（錢、時間）就唔會落入婚姻以外，「沒有社會意義嘅性行為」當中。簡單黎講，男人有1000蚊，社會梗係希望佢攞去比仔女讀書，而唔係subscribe 我個patreon睇性感相。

睇到呢度，唔難發現，「道德」其實就係維穩。而呢套道德框架最大最大嘅前設，就係根本無當過男男女女係有情慾、有自主嘅人，而只係建制下嘅一顆顆螺絲。喺呢個框架下，男人固然係受壓逼的，但女人更甚，因為女人嘅性彷彿只因男人嘅慾望而存，而男人嘅性慾至少會被視為理所當然，但女人則只係配合者，係要按住男人嘅性慾與需求，去調整自己嘅生仔工具。女人嘅性慾並不被視為獨立存在，甚至被視為不存在。

喺呢個框架下，女人又點可以享受性、享受性感呢？就算真有蕩婦如此，何解又要怨毒到收錢，黎分薄家庭結構嘅資源？簡直罪加一等！或許，呢種根深蒂固嘅封建思想，就係現代人仍然如此怨恨蕩婦、妓女嘅原因。當然，好多人動輒鬧人係雞，又如此激動無禮，都真係因為出於無腦同無家教、唔識尊重人，但唔代表呢種思維背後只有怨毒，而沒有任何有意義嘅根基。而呢種封建思想是否過時，與個人自由比較，邊個喺現代社會更為重要，亦唔係非黑即白嘅，就等大家再諗諗了。