互聯網嘅發達、女人嘅疏忽同信錯人、部分男人嘅賤格,令每日都有不少女人嘅情慾照片/影片被流出,近期鬧得熾熱嘅有空姐慾照、地產經紀性愛短片、Jennifer Lawrence,要數例子恐怕要數到下世紀。有自拍、有偷拍、有被逼拍嘅;有名人,有普通人。慾照流出後,事主嘅反應各異,喺美國,就有女生因裸照被瘋傳而自殺,佢父母將女兒嘅故事拍成紀錄片 《Audrie & Daisy》(2016),希望警醒世人侵害他人私隱、網絡欺凌嘅嚴重性。

不經事主同意流出私人照片或影片,明顯地,係發佈者有違道德、背信棄義、陷人於不義。但奇怪嘅係,社會對發佈者嘅批判係有限嘅(可能因為多數為匿名),但對受害人嘅批判同欺凌卻無日無之:淫照流出10年後嘅今日,阿嬌鍾欣桐依然不時被舊事重提與恥笑。女人單純地展露情慾嘅一面,喺世人面前呈現,彷彿已經係一種罪;即使佢地係被侵犯嘅受害人,都逃不過被欺凌、冠上不同難聽綽號嘅命運。而男人呢?即使慾照流出,會被部分人批判,但亦有可能同時被妒忌、崇拜;而喺公眾面前露全相,並不會一面倒被視為係佢嘅損失。

女人身體被看見,係女人嘅損失;女人看見男人嘅身體,都係女人嘅損失。呢個社會就係如此看待、壓抑女人嘅情慾。

我希望推廣嘅一個理念係,女人走性感嘅路線,甚至比人睇曬全相,無論有否經過佢本人同意,都無減佢嘅價值。佢依然可以係一個值得被尊重、有事業、有感情、有血有肉嘅人。只要社會都咁諗,先可以防止下一個Audrie出現。殺Audrie嘅唔單止係影佢相、公開佢相、幫手評頭品足嘅人;殺Audrie嘅,仲係呢個社會嘅保守風氣,將女人嘅「貞操」、「純潔」放到至高無上,將「蕩婦」、「不純潔」嘅女人甚至受害人,批評到體無完膚。咁樣會令女人認為,一旦失去貞節、一但被窺探到身體同情慾,佢地嘅人生就玩完。呢種風氣,亦殺死左好多強姦受害人,而呢種風氣,可能你同我都有份建立。成日話唔好blame the victim,唔好檢討受害人,其中一個原因就係想逆止呢個風氣。另外,唔好以為你係男人就無事,甚至樂於去推波助瀾:下一個被呢個風氣殺死嘅,可能就係你重視嘅親人、朋友、姐妹、女兒。男女唔係對立的,男人身邊有女人,女人身邊亦有男人。

身體自主、情慾自主,講嘅係人(不論男女)可以喺不傷害其他人嘅情況下,按自己喜好同需要,運用自己嘅身體、發掘自己嘅情慾,而性罪行,就係剝奪左呢種自主。講真,未經授權發放他人嘅慾照,唔單止係仆街,更應該被視為性罪行,因為事主並無公開展示身體嘅意思,將其公開明顯係剝奪左佢嘅身體自主。當然,男男女女都唔好咁傻,以為呢個世界有人信得過,就走去同人裸聊、傳裸照,因為你永遠唔知到呢個人幾時會出賣你(情侶都可以分手啦),甚至係詐騙集團黎,除非你有照片有日被公開嘅心裡準備。