我成日聽到好多男仔講，要操fit d，練肌肉練大隻，先敢去游水。又眼見好多女仔，都秒秒爲減肥節食而煩惱，爲嘅，可能只係夏天去下游水消暑。

追求社會認同嘅「美」，本來並無問題，但去到因此而精神大受困擾，正常生活受到影響，就絕對唔值得。隨處社會越來越富裕，面對呢個問題嘅，已經唔單單侷限於女性，男人嘅身體都開始受到更多批判。

現代人日日俾海量廣告轟炸，好多對自己嘅批判，其實都係來自時裝、美容商界嘅潛移默化。日日睇住螢幕上修過圖、或者由成個團隊全職塑造嘅男女模特兒，難免會對自己嘅外貌都嚴苛d。當你越自卑，對自己越刻薄，就越會幫襯佢地，佢地就越搵得多錢。所謂「美嘅標準」，或者都只係商業嘅陷阱。

眾所周知，我又圓又矮，呢幅相更加顯露曬個豬腩出黎，腳好粗壯，肚皮仲有摺痕同埋手術遺留嘅刀疤。以前，我都會好介意自己手臂肥、腰粗、腳粗等等，因此成日都會坐立不安。莫講話著泳衣，就咁坐喺度影相已經係大忌，因為個肚會凸曬必曬出黎。

但當我換個角度諗，去到海灘，出到街，根本無乜人得閒留意你嘅外貌身材，就算有，佢地兩秒後都會唔記得。呢d對自己嘅批判，其實全部都係自製嘅壓力，對你最嚴苛嘅就係你自己，唔係其他人。只要我地學識將他人嘅目光看輕，同時放低對自己嘅批判，其實我地嘅生活可以過得好輕鬆。

男又好，女又好，每個人都只有一個身體，我地唔應該憎恨同對抗自己嘅身體，而係學識欣賞同好好滋養佢。同時間，我地都要學習唔好對其他人嘅外貌咁苛刻，當我地學懂左尊重別人，好快都會學習到愛自己。

肥又如何，瘦又如何，美又如何，醜又如何，只要有自信，就可以活出自己嘅美。