經過我多番提醒，唔知大家有無醒覺到，香港嘅審美觀真係非常單一，單一之處唔單止係體型、面部輪廓，仲有膚色：白就係靚，黑就係醜。我地之所以有呢種審美觀，大致可以分為兩個因素：歷史因素、商業因素。

首先，西方嘅富強，加上殖民地歷史，令我地耳濡目染下不自覺地崇尚西方人形象：高鼻樑、細鼻頭、大眼、白哲膚色、雙眼皮、尖下巴、深邃嘅輪廓……即使去到今時今日，社會普遍依然會認為，越貼近白種人嘅形象就係越「美」。當連西方社會都開始識欣賞單眼皮、圓臉、貓眼等嘅東方美態，我地自己卻仍然厭惡自己種族嘅臉部特徵，其實係好可惜。

第二，歷史黎講呢，窮等人家嘅女兒先要出去工作、日曬雨淋，搞到皮膚黝黑粗糙。富裕人家嘅千金就可以不出閨門，唔洗皮膚受風吹雨打，保持又白又滑。時至今日，撇除基因，有無錢同時間做臉部防曬、護膚，都係階級嘅彰顯。所以崇尚白哲膚色，都可以係階級意識嘅一種。西方就唔同，佢地本身白，而有錢人先去得起旅遊度假，去下曬日光浴，所以佢地大部分人會崇尚陽光/所謂健康膚色，但原理係類近。

第三，商業因素。試諗下，依家半個地球嘅人覺得自己要變黑d，半個地球嘅人覺得自己要變白d，邊個最開心？無錯，又係美容化妝業。我地每日睇到嘅廣告，不斷灌輸比我地知，我地未夠好、永遠都未夠好，一定要做些甚麼去改善。其實，呢d全部就係美容業界嘅推波助瀾，目的就係等大家自我形象低落，然後比錢用佢地嘅產品同服務。歐美嘅tanning booth（曬紫外光燈中心）、亞洲嘅各項美白療程，全部都係龐大嘅生意，億億聲嘅。

我寫呢篇嘢唔係為左否定一種審美觀，或者否定你地對美嘅睇法：每個人都有權覺得一樣野靚或唔靚。我只係希望大家下次喺審美、評論其他人之前，諗多一步，意識翻美麗其實沒有特定嘅標準，你今日之所以有呢個審美觀，可以係來自好多或許係過時同無謂嘅因素，無對錯嘅，不過唔需要視之為金科玉律。

又，其實我本身只係玩下p圖，試下p黑自己😂 整整下又打左成篇嘢😂 其實唔需要咁認真，不過希望你地都enjoy 睇啦😂