我寫過好多關於 body positivity 嘅觀點,講述我地可以如何去與自己不完美嘅軀殼和平共處,亦多次指出我地嘅不安,係由一班既得利益者操控(時裝、美容業時刻極力讓我地不滿意自己,佢地嘅如意算盤先能持續地打響),每日喺不同媒介疲勞轟炸我地,向我地推銷所謂完美嘅身體、得體嘅形象。所以,白人會想變黑,黑人會想變白,瘦人會想有波,有波嘅會想有腰,總之,無論如何,我地始終會被灌輸呢刻嘅自己不但不完美,更需要改進,從而去光顧業界嘅服務。

呢個風氣造就嘅問題,之所以影響少女為最深,除左因為少女嘅自我形象尚未成形,亦因為年輕人往往係最欠缺資本嘅一群,想追逐美麗都有心無力。因此,少女係最容易受厭食症、暴食症等與身體形象有關嘅精神病折磨,嚴重者除左會長期抑鬱,更可能會死亡。我一直寫嘅嘢,就係希望幫呢群人走出黎,亦係幫緊以往嘅自己。

雖然如此,但有時我都會諗,如果我幾層樓,有幾百萬閒錢攞出黎,或許我真係唔會介意去試下抽脂、削骨、隆胸、隆臀。寧願自投美容業界設下嘅圈套,都想試下用錢黎睇下買唔買到自信,亦提升自己競爭力,始終靚人嘅優勢比平凡人多,喺好多層面與行業都係,呢點好難否定。

所以,「唔靚」嘅人,其實就係無資本嘅人、競爭力被比下去嘅人。當然,你可以話,內在美比外在美重要,知識就是力量,呢啲我完全同意,但事實係,內外兼備嘅,亦大有人在,單有一種美已經係不足夠。

早前其中兩篇文都有相關嘅觀點,論述「美感就是階級」、「性感要有美感」等。我諗我呢刻嘅掙扎係,假如我變得財政上富有了,我仍然會堅守 #bodypositivity 嘅價值嗎?假如有人比幾十萬我一個月,叫我唔好再露肉再寫性別嘢,我仍會堅持寫嗎?如果唔會,咁可能今日嘅我,都只係一個被困在某個階層嘅抗爭者、失敗者,因為無錢所以先逼不得已接受自己不完美嘅身體。咁我對抗緊嘅,其實係咩?社會嗎?錢嗎?自己嗎?階級嗎?「優」嗎?閒言閒語嗎?Trolls/haters嗎?Bullying嗎?我都唔知了。

雖然我始終相信,再美麗嘅人,如果唔懂得與自己身體和平共處,都係會終日掙扎不安嘅。 呢個就係業界嘅威力,亦可以話係大部分人類嘅天性,永遠都想贏出競爭。 然而,利益同金錢都會讓人腐化,假如我有能力改變自己嘅身體,或者可以透過咁做換來某些利益,或者我都會抵受不住誘惑而去放棄初心。呢個就係我早前寫嘅文章所忽略嘅盲點。 (呢幾日showcase 嘅lingerie,全部都原價$2000一套,而我又發現落力左去edit啲圖,例如加下花花底,的確比起我以前求其穿個幾百蚊爛bra自拍討喜好多。討自己嘅喜,亦討別人嘅喜,所以我開始反省到,部分人大概唔係不喜歡性感,而係不喜歡性感得黎看似cheap而又唔係太靚嘅嘢。)