Follow開我嘅朋友都應該知道，製作及Post性感照片除左係我嘅嗜好，我更加喜歡藉機觀察網民對呢d照片、以及我嘅論述嘅反應，再從中反思大眾對性別議題嘅不同看法，好讓我又可以再去建構更新更全面嘅觀點。

呢半年，我發現照片下嘅留言一個有趣嘅改變 —— 鬧我「搏乜」嘅言論比以前大幅減少。巧合地，「搏乜」謾罵嘅減少，就係自從我買左部相機（而非用低清手機前鏡）、開始搵人幫我揸機（而非自拍）、化妝和造型都講究左一點點（而非求其素顏亂拍），亦姐係我喺照片上，投放了比以前多幾倍嘅資源，之後先發生的。

我以前會對「搏乜」呢類謾罵嗤之以鼻，覺得佢地只係封閉、水平低、無禮貌、無學識。但其實，即使佢地可能確實如此，畢竟「遇到不同意但沒有重大問題嘅事時學習尊重與控制自己把口」都係一種修養，但即使如此，都唔代表我地唔可以喺呢類謾罵中，反思到一點點：假如我嘅所謂性感照，僅為為工作而拍攝嘅專業照片，又或是別人捕捉嘅不經意的日常，呢種比較不具炫耀嘅目的性、而且需要大量資源去製作嘅照片，是否會比較少得到「搏乜」嘅洗禮？答案係Yes。

搏，姐係投放少，回報多。而一張照片要做到「不經意」、「非目的」、「日常的」，需要嘅就係大量資源，由擁有一部高清嘅相機、到有眼光敏銳且攝影風格獨特嘅朋友肯幫你影相、到有時間去不同地方取景（喺星加坡infinity pool影相就洗左我$8000）、到維持到一個不令人反感嘅外觀（護膚、護髮、化妝、衣著）。「美麗」就是要投放資本、就是要勞動，要一張照片脫離自拍照嗰種「普通人膚淺自戀」嘅「搏乜」感，需要嘅通通都係資本：文化資本、社會資本、人際條件、錢。
_________

我早期所post嘅性感照，之所以換來呢類「搏乜」嘅評語，其實並非單純嘅道德問題，更加係階級嘅問題：我「唔靚」、亦無專業攝影團隊拍攝後製、無善於拍照嘅朋友所以要舉起手機自戀地自拍，我必須自己下載令照片變低清嘅app黎修圖，亦無大眾媒體替我發布照片，需要自己post。

Hater嘅「搏乜」感，正正就係由階級而生。姐係話，我嘅照片不但有道德問題，更加係「反映到emilia低下嘅階級」，所以罪加一等。雖然Hater自己未必意識到佢自己嘅定位，笑。

無一個議題唔係誇層面嘅。我以往對於性別嘅討論，往往只係focus喺道德層面，而比較少去喺其他層面討論。比如「身體自主」，其實都係好階級嘅觀念：假如一個女生，連賺錢養活自己嘅能力同機會都無，何來自主地運用身體？佢只會被逼出賣勞力/身體。我以後都會試下喺其他層面討論多d，將一切歸咎於道德層面、不懂尊重之類，係我以往嘅問題同盲點。

參考文章：【網美的女性主義：不要笑，美麗就是無止盡的勞動】by 女人迷編輯 婉昀

相關文章：展露自己與羞恥感