我希望IG 上多d 核突嘅照片、多d 「唔靚」嘅臉孔、多d 賤肉橫飛、多d over左嘅低檔次嘅露肉、多d不恰當嘅性感,等大家明白,我地唔需要假裝完美、堆砌美麗,都可以活得好好。

呢個世代同以前好唔同,我地嘅生活離不開手機,更離不開社交網絡。科技嘅普及,讓我地中門大開,容許資訊無孔不入地佔據我地嘅生活。同時,社交平台資訊繁多,以照片為重嘅平台更加係鼓勵膚淺嘅judgment,scroll 下個profile,用30秒嘅時間,就能夠讓人自以為能夠標籤、了解、判斷一個人。

年輕人每日睇住手機,被一個個近乎完美嘅形象衝擊包圍,潛移默化地,主流審美所推崇嘅美,好似變成唯一能被接受嘅形象。身型差少少、肥少少、平庸少少,只要exist喺社交平台而又somehow引起到部分人嘅注意,呼吸都會係錯。記得有一次入戲院睇西片,鏡頭影住一個肥肥地嘅黑人跑過黎,旁邊嘅香港觀眾已經即刻喺度騎騎笑,但人地嘅角色設定、故事背景情節,根本毫無搞笑嘅成分。香港人就係習慣左,肥嘅人,唔靚嘅人,就只能做丑角,做開心果,做配菜,肥人醜人嘅愛情只能係搞笑、性格只能係負面、工作能力只能夠係低下。

種種嘅因素,令伴著科技成長嘅我地對人苛刻左,更加令我地對自己苛刻左好多:自從我開始寫身體政治嘅嘢,已經有不下300個讀者PM,同我分享佢地如何憎恨自己嘅身體,如何同厭食症等搏鬥。
其實,好多人都無意識到,我地網上接觸到90%嘅資訊,都係假嘅: 照片中嘅主角悉心化妝、造型,之後擺出最好睇嘅姿勢,最適合嘅角度,再經過不同軟體修圖,呈現最完美嘅一面。即使天生麗質嘅model美人們,佢地依然都會修圖,亦會有鬆懈嘅時候,只係無比我地見到,而且,佢地喺IG 上面不斷展示完美嘅外表,其實係整個團隊嘅成果,亦係佢地嘅工作一部分,一般人根本唔需要因比較而感到壓力。

講咁多,唔係叫大家杯葛美麗嘅人事物。No。展示美麗很好。有自信去表現自己很好。欣賞他人嘅美都很好。重點係,我地呢d 平庸嘅人,如何可以喺呢個世代,不被矇騙、不陷於自卑自毀之中,甚至,能夠學習擁有自信、擁有快樂。

我認為,除左好好充實自己,令自己有外表以外嘅優勢,我地更加可以令IG 呢d 平台,開始出現各種不完美嘅角度照、醜陋嘅身體、尷尬扭曲嘅面容、沒格調嘅暴露……透過呢種表達方式,我地可以嘗試拓闊大家嘅審美,令大家習慣平庸,甚至習慣醜陋。因為真實嘅我地,就係時美時醜、時而鬆懈時打扮,無理由每日都只能夠被「完美」嘅影像逼迫我地。 #平庸無罪 ,希望我同你都可以對自己寬容一點,過得輕鬆一點。

 

相關文章:

點解我要特登扭曲身體展示個肥腩出黎?

肥得滯嘅肥婆,仲有咩資格宣揚身體自主?

有試過因為減肥而折磨自己嘅,click入黎

(英)橙皮紋與肚腩