（圖為外國濕疹少女，body positivity 運動參與者，非文章當事人。）
You are more than your illness.
屯門揭發23歲女生「弒父殺母」後自殺三屍倫常慘劇。一名剛大學畢業女生，表示長期飽受濕疹折騰，感到生不如死，疑在父親節當晚在屯門寓所內，涉嫌以「穿心刀」弒殺父母後，復以自製毒氣袋笠頭自盡。
香港係一個好畸形嘅社會，壓力同對人嘅批判都大得驚人。來自自己與他人嘅壓力，又會不斷互為因果，嚴重嘅甚至會誘發出不同嘅身心病症。患病影響情緒，情緒又會再惡化病情。
我唔係濕疹患者，無法完全理解事主嘅痛苦。只係我眼見，香港對於不同病患者嘅情緒支援真係好缺乏。喺歐美，近年都唔難見到不同嘅活動，鼓勵健康/身體/外表不完美嘅人接受自己、做自己、欣賞自己，積極面對病情，呼籲社會多同理、少惡言。喺香港？你只係簡簡單單叫人「停批評，欣賞美」，都已經會換來一大班自命好理性但其實只係嘴賤嘅人，同你講唔美就係唔美，喺度自欺欺人不如砍掉重練。
能夠做出殺父弒母再自殺，想必事主必定係從多方面長期受到極大痛苦：身體、心靈、社交、家庭等嘅因素交纏不清。逝者已矣，我唔熟悉佢，唔會評論對錯更不會（亦無資格）將事件歸咎於單一因素，我只係諗，如果呢個社會可以少啲批判、多啲支援、多啲鼓勵同接納，唔知會唔會能夠避免下一單慘劇發生呢？如果事主（疑似）喺討論區談論如何自殺嘅時候，唔好有一群花生友間接推波助瀾，興高采烈討論點死法，呢單慘劇嘅結局又會唔會有一絲改變到嘅機會呢？
可惜嘅係，呢個世界無咁多「如果」，但如果可以，我好想同曬呢個世界所有正在受折磨嘅人講，頂硬上，你得嘅！你就係你，你唔係你嘅病！但健康嘅我實在太無資格如此輕易地說出呢啲豪情壯語啦，唯有寄望有啲身位恰當嘅人可以幫到呢班受緊折磨嘅香港人……
Emilia's Gender Blog 