近日，偷拍風波鬧得熾熱，社會關注偷拍者侵犯他人身體自主嘅行為，的確係好事，然而，我雖作為揭發者，卻是不太同意大部分人標榜偷拍者為性變態的。如果大家都有留意開我嘅性別小文，應該都會知道我對性癖好、性幻想嘅包容度幾乎是無底線的。我甚至連暴力、強姦等嘅性慾望都可以接受，何況只是區區偷拍？

因此，我批判偷拍者，並不是從純潔的「道德高地」向他們投石的。我深知道我地唔係聖人，唔係煉仙，每個人或多或少都有「不道德」嘅性癖好，要完全遏止，是不人道、不健康也不可能。更何況，偷窺的滿足感正正是來自犯禁，所以，越遭受壓抑和污名化，就只有越能激活偷窺的快感，形成反效果。

有偷窺慾不是罪，問題係你地將呢啲慾望，切切實實地用侵害他人嘅方式發洩出來，而且還要自命正義、大言不慚，甚至反過來批鬥攻擊被侵害嘅女生，再將照片不斷廣傳翻炒，對受害人造成一波又一波的傷害。

性癖好很應該獲得釋放，但條件是一定不能肆意侵害其他人，要在合法，以及合意的前提下恰當地釋放。例如偷窺癖、強姦慾，其實係可以透過與伴侶協商，或者付費比性工作者，合法、合意地進行，而唔需要真係去偷窺或強姦。你可以適當地請求伴侶/性工作者走光俾你睇，或者玩角色扮演、強姦遊戲。當然，玩呢啲性愛遊戲或許無真係侵犯別人咁刺激，但呢個係活在文明社會最開明折衷嘅做法，止癢之餘又無須作惡。雖則唔係個個伴侶都接受到呢啲癖好，所以還是要多多溝通，和慢慢尋找對的人的。最後，就係要讓香港嘅風氣更加開放，令大家都不那麼壓抑。（註: 「開放」並不代表可以傷害他人）

其實我痛恨嘅唔單單係偷拍裙底嘅行為本身，比起其他侵犯人身嘅罪行，偷拍裙底的確並非大奸大惡。我痛恨嘅係嗰種肆意侵犯、剝奪他人自主權同私隱，而且還覺得毫無問題嘅價值觀。更甚，佢地會透過剝削他人，來實踐圈子內嘅英雄主義：邊個侵害得最多人、最嚴重，就係最受推崇，不斷鼓勵圈內人將慾望自私地發洩在無辜嘅人身上，日夜鼓勵其他人將慾望透過違法和侵犯他人嘅方式付諸實行。

喺處理偷拍事件嘅過程中，我不斷睇到不同女生被侵害、出賣，有啲難受又有啲唏噓咁，而我知道好多受害人都一樣，感到極度不受尊重，好似無被當作一個人，而只係被強行當作一件無靈魂嘅性玩具，喺無同意嘅情況下強行被人拿來洩慾。各位，比人出賣、侵犯嘅感覺真係非常難受，好唔turn on的，希望你地可以享受性愛情慾之餘，都做翻個會尊重伴侶、尊重其他人嘅人，就算有性癖好，都要用不侵犯人嘅方式來實踐