To剪or not to剪？

本來，修剪體毛與否只係一種審美觀和個人習慣，鍾意剪咪剪，唔剪咪唔剪。所以，我以前都會覺得，外國某啲分支嘅女權主義者經常喺體毛呢個範疇大戰，係有點小題大造，而且好多論點我都好有保留，例如社會單單要求女性剃毛係性別不平等，我是不同意的，因為社會對男性都同時有一定嘅審美要求，例如整齊嘅鬍鬚、適量嘅肌肉等。各有各要求，並非只針對女生。因此，就體毛呢方面嘅性別爭議，我認為是無謂的，就無著墨去講。

然而，隨住越來越多女生向我剖白/報料，道出好多關於體毛嘅誤解同經歷，我就發現，或許我都真係需要講一講呢個話題。

1. 你不需要為了滿足伴侶而修剪體毛
讀者M同我講，話男朋友好鍾意佢剃曬啲毛毛。但佢次次剃完都好唔舒服，又痕又痛，行步路都會辛苦。 我嘅回應係，其實伴侶之間有點情趣係好事，試一兩次都無壞，但如果真係唔舒服嘅，就好應該坦誠同男朋友講。佢真係愛你嘅，唔會為左少少嘅視覺刺激而要你辛苦。

2. 體毛無關衛生問題
體毛有好重要嘅作用，包括保護你嘅皮膚、幫你隔一隔開啲細菌同汗水、減低摩擦力等等。絕大部分時候，人不同部位嘅體毛都無關「衛生」問題，唔會話唔剃毛就係污糟啲、噁心啲、臭啲。搞笑嘅係，原來好多人都會誤會，以為唔剃毛就係污糟邋遢。尤其原來是有啲男生，會用呢樣嘢黎比壓力啲女朋友，但自己又唔係好groomed🙈 It is just a beauty standard, not a necessity.
3. 多體毛=淫？
呢個更加係無根據。讀者A同我講，話同男朋友第一次親熱，然後男朋友見到佢好多體毛，就話佢好淫，質疑佢係咪老江湖。首先，就算係淫蕩或者係老江湖，又如何呢？其次，體毛多與少同性慾係無任何關係，唔好再信埋啲無根據嘅嘢再用呢啲廢話傷害人啦。

好多野，我以為只係常識。但原來，如果無人出黎講呢啲常識，就真係會有啲傻仔，用啲錯誤嘅觀念比壓力自己嘅伴侶或朋友。我唔反對人修剪體毛，我自己有時都會修剪，但我地必須要搞清楚，修剪體毛只係一個選擇，不代表個人衛生或性格。別人修剪體毛與否，都係佢地嘅身體自主，其他人沒有加把口評論、批評嘅需要。