「處女膜」唔係膜,亦唔關處女事

好多人對「處女膜」有過多嘅想像,認為佢係女性貞潔嘅象徵。不少男生更受電影等影響,渴望替女生「落紅」,喺床單上留下血跡。其實,社會對處女膜嘅普遍嘅想法與執著,不但對女性係一種文化上嘅壓迫,甚至可能係大!錯!特!錯!

1. 「處女膜係一塊膜」?錯!
陰道前膜(姐係所謂處女膜),多數都唔係完整一塊,而係有一個或多個窿窿,供經血和分泌物穿過。啲窿窿可以細到不能通過一指,大到可容兩指,喺無窿窿嘅罕見情況下,則有醫學需要進行手術切開。有些女生則是天生沒有陰道前膜的。

2. 「性交時有滴血嘅就係處女,無就唔係」?錯!
有女生係天生就無陰道前膜嘅,就算有,劇烈運動都可以導致陰道前膜破裂。亦有情況係經過多次性交,陰道前膜依然完整。所以,「處女膜」根本不代表什麼。

至於初夜會落紅?其實,約80%女性嘅初夜係沒有肉眼可見嘅出血,可能係因為陰道內膜沒有因性交破裂,亦可能因為破裂嘅位置剛好無血管。就算真係破裂左,多數情況下,亦只會造成前膜多處細小傷痕(而不是坊間想像的「撕裂」或「督穿」佢),出血速度會好慢,同時陰莖插入亦起到壓迫止血嘅作用,所以好少會有明顯嘅血跡。如果好明顯地流血,或有極大痛楚,好可能係因為雙方性經驗或技巧不足,或因緊張等原因,導致陰道未夠濕潤或放鬆,整傷咗陰道組織,並唔係乜嘢值得高興嘅事。

喺古代,多數女孩都係喺青春期結婚,生殖器官未完全成熟,非常脆弱,加上他們不在乎女性嘅需要和舒適,所以更容易會有初夜出血嘅現象,配合視女性為貨物嘅態度,以致流傳左呢種「初夜出血,男人好威」咁嘅錯誤價值觀落黎。

我仲見到世界各地尤其是保守嘅地區,好盛行賣「初夜假血膠囊」或「處女膜封閉手術」,真係荒謬,為嘅就係比女生確保自己與丈夫初次性交時有血,滿足社會嘅要求同丈夫嘅慾望。

3. 「如果上帝唔係要女人保護貞操,咁塊膜攞黎做乜?點解要比塊處女膜女人,而男人就無呢?」 唔係講笑,我真係聽過人咁講!呢種想法迂腐得黎,仲真係嚴重缺乏醫學常識!女性嘅生殖器官,組織與構造都與男性不同,較容易受感染。因此,陰道前膜其實係用黎阻隔細菌,有防止有害細菌入侵陰道嘅實際作用,特別係在嬰兒至青春期呢段期間。青春期以後,隨住卵巢發育完全,體內激素增多,陰道抵抗力會加強,陰道前膜亦就不再需要了。

所以,我認為,我地唔應該叫「處女膜」做「處女膜」,因為呢個詞不但不準確,亦為女性帶來太多包袱啦,不如我地由今日開始,改口叫佢做「陰道前膜」,sounds good?(然而,其實根本唔需要太focus on 呢塊膜/貞操啦,咩年代呀。)