【非廣告】話說上星期基於好奇心，走左去試飄眉，其實我連出去俾人修眉都未試過，第一次就整啲咁嘅嘢，有啲chur😂

飄眉過程中雖然只係少少痛，但啲聲音同質感真係好恐怖，喺度𠝹𠝹割割咁，切落條眉度。然後我就諗起，omg，點解有啲人（多為女生），可以鼓起咁大勇氣，走去真點整容？小至割雙眼皮，大至移除肋骨令條腰幼啲、打斷腿骨等佢重新生長，達至增高效果，呢啲手術，一定比我整條眉恐怖好多倍。

訓喺度任人宰割，又要痛好耐，又唔知會唔會為身體帶來永久傷害，又唔知會唔會手術失敗仲樣衰左，點解咁多女生可以鼓起勇氣做呢啲咁危險嘅嘢？

為咗靚，社會可以逼到女人去到幾盡？😕 追求美係人之常情，但有時候，好多女生根本唔察覺自己原本已經好靚、好有特色，可能化個淡妝等自己望落精神啲，已經好好睇，結果就不斷迫自己去變成其他人咁嘅樣，仲不惜花好多時間金錢精神，令自己變得符合大眾嘅審美觀。

其實呢個世界，真係各花入各眼（睇下AV網站題材就知），無論你嘅外型係點，總會有識得欣賞你嘅人，根本唔使對自己太過苛刻吧🤨

而且，其實內在美先係持久的，外表未必經得起時間（唔係話老左唔好睇，而係幾靚嘅人都會睇厭）。

所以，追求美嘅同時，都唔好忘記要增值自己，令自己變成一個更好嘅人。題外話，其實我次次出街，都見到香港真係好多好多靚女，希望佢哋都發覺到自己嘅靚。