喺沙田見到一個女生，著住一身歌德女皇式lace 長裙配腰封，靚得黎又唔誇張，身體曲線細緻優美，好睇又喺香港好罕見。我之前睇過一啲紀錄片，講用腰封做waist training為身體塑形，要練到好似佢條腰咁幼並非易事，需要好大嘅努力、知識同堅持。機會難得，所以我就走去表達我嘅欣賞，問佢可唔可以俾我影張相，當然佢亦同意左。

街拍喺香港唔係犯法，所以我見好多人都用「香港無肖像權囉」「犯法呀？」「我覺得你靚先影你咋！」 ，黎合理化自己喺街偷影女仔甚至特寫其胸部/私處嘅行為。但其實喺公眾場合撩鼻屎都唔犯法，喺公眾場合開speaker 大聲講電話都唔犯法，但基於尊重自己同尊重他人，我地都唔會鼓勵此等行為。一件事唔犯法，唔代表你可以大條道理做，特別係當你影響，甚至侵害到其他人嘅時候。

其實，我大可以喺佢後面偷影佢，如果我係嗰啲偷拍人士，可能已經偷拍完仲擺佢上啲群組，用好露骨嘅字眼同9000人一齊意淫佢。但其實呢個偷拍嘅心態同風氣，根本唔需要存在：想影人咪開口問囉！洗乜偷拍姐！

當然，我明白男性要面對嘅情況唔同，如男性去問女性（or other genders）可能會有多啲障礙同尷尬，或者，部分女生都有可能會反感比男人咁問（但我肯定你偷拍，佢地仲反感囉）。呢個真係要睇你好唔好彩，想影嘅咪光明正大問，如果人地比咪影，唔比咪唔好影！唔好做縮頭烏龜！女生都要唔好咁敏感，如果人地係尊重、禮貌地approach，你地唔好第一秒就當人變態！一人行一步！當然，整個社會風氣咁壓迫，人與人之間咁少信任、咁多猜疑同憎恨，真係大家都輸，每一個互動都要小心奕奕。

有幾次，我同frd子去旅行時，好似係由於我地太靚啦（我狐假虎威），都間中會比當地人要求合照。好多時我地都ok，唔ok嘅時候咪禮貌拒絕，not a big deal。問嘅唔洗怕，唔洗玻璃心；被問嘅都唔洗怕，唔洗太大戒心～
由今日開始，試下多啲尊重同多啲勇敢，唔好做縮頭龜啦🐢