呢啲terms近年開始由學術象牙塔，滲到出去比大眾認識到，絕對係好事。但同時，由於呢啲概念本來就有好多詮釋嘅方向，所以成日會被利用、濫用或曲解。更甚，不少群眾剛認識到呢啲字，就只係想攞啲字黎鬧人，而唔係講道理，會抽空曬背景黎講。有見及此，我都想講下我對呢啲concept 嘅見解。
喺女性主義嘅脈絡中（特別是基進女性主義Radical Feminism），「物化」往往聚焦於對女性身體嘅物化，背後脈絡為批判剝削、支配女性嘅父權社會。
所謂父權社會，姐係性別二元、性別定型強烈、男尊女卑嘅刻板社會，女性最大嘅存在價值就係被洩慾同生育，除此之外都係負累。其實，只係半世紀前，我媽媽嗰輩，都已經會有大部分人認為女孩子唔應該讀書；直到社會政策帶頭改變風氣(例如推全民免費教育)，幾十年後嘅今日，香港社會制度上先大致上性別平等（我認為）。但思想上，仍然會有人認為女性天生智慧較遜、唔洗識咁多野，亦仍有人認為男性應當獨力擔起成頭家、流血不流淚等。
男主外、女主內呢個觀念就係父權社會其中一個軸心思想，喺呢個基礎上，無論制度、抑或文化，男性都會喺公共領域獲得優勢。因此，統治階層、上位者多為男性。偶爾或許會出現女性領導者，但稱謂通常都要加上個「女」字，惟恐天下不知女性做領導者係幾咁例外。
喺父權社會下，女性被預設係沒有權力，沒有公共地位的，女性嘅思想或需要都係不被重視嘅。因此，「物化」很惡，因為女性本身就是被剝削的，假如還要比男性搓圓撳扁，視為物件去看待或利用，又往往不能收穫這些被利用嘅成果 ，亦無途徑、無資源為自己真正嘅想法發聲，當然「物化」係好有問題嘅事。
但今日嘅香港，係咪真係再好似以往咁，女性從制度上、資源上就係被男性剝削住，又欠缺發聲嘅媒介或途徑呢？我並不認為係咁的。 我認為，現今社會仍然有針對性別嘅差別待遇或歧視，但係係各有各歧視，而唔係女性單方面被害和被剝削，男性同其他性別，都同樣要面對佢地嘅性別差別待遇，而且可能不比女性面對嘅嚴峻。香港社會主要嘅權力問題，可能係來自階層同錢，而唔係性別。
亦因此，即使係「物化女性」，亦變得無以前咁惡咁差，因為女性作為一整個群體，不再係無權利、無權力、無平台。雖然思想上古板嘅人仍有不少，但時移勢易，女性要喺公共領域、職場上發揮，都似乎無以前咁困難重重。改善空間當然仍有，例如研究增加侍產假、提供母乳友善嘅辦公環境、彈性工時等，都能夠進一步釋放女性嘅工作潛能。
喺呢個背景下，我會認為追求自主、推廣自主，係比較能夠突破社會喺思想、文化上對各種性別嘅剩餘「框框」。既然女性已經唔再係無權無勢，咁當佢地嘅身體被當成商品、慾望載體之時，亦唔應該即時覺得佢係被「物化」，而係要睇下佢有無同意呢種行為。假如佢係同意被當成商品看待，就不存在以往性別不平等下嘅什麼物化不物化。
將自己「物化」、「商品化」有好多形式，例如澳洲呢位醫生，喜歡將自己身體當作畫布黎紋身，力排眾議都要繼續實行自己嘅喜好。由醫生嘅例子可見，自主、力排眾議，好多時都要睇條件看本錢。網上不少支持醫生嘅言論，都係基於佢嘅能力同紋身好睇。假如佢只係一個低下階層，應該都會被紋身嘅刻板印象擊倒吧，而當遭反對，亦無咁多人力物力財力對抗吧。@rosesarered_23
又有人會話，點解永遠都係啲奇怪嘅人先會主張身體自主之類。雖然係諗唔通但又無講錯：自由、自主呢啲概念嘅可貴之處，正正係在於佢地要用黎保護一啲脆弱、不被接納嘅嘢。假如你嘅思想愛惡，完全符合社會主流期望，那很好，你本來就已經有很大自由同空間做你喜歡嘅事，比如穿長褲、比如留短髮、比如行山，呢啲嘢你做嘅時候，視乎你嘅背景，一般都不會惹來好大阻撓。 點解某啲人要強調自主自由嘅重要性，恰恰就係因為佢地平日得不到發揮嘅空間，而之所以沒有空間，就係因為不符合大眾要求，所以被排斥吧。恭喜你係大多數人，你可以繼續你嘅生活，但請也嘗試尊重與你不同的人的生活方式吧。
參考文章: 《動漫萌角色：動漫文化物化了女性？》王佩迪
Emilia's Gender Blog 