想分享下最近呢個月嘅運動心得。幾年前有一段時間,我經常因為介意自己體型而不斷運動同節食,嗰時日日都好辛苦,成個腦都係掛住減肥,肚餓會開心、食嘢會內疚,日日都運動。雖然係咁,但我都唔係話特別瘦,keep 住49-51kg,亦不斷覺得自己好肥好嘔心(其實根本唔係),所以我更加沮喪,因為永遠都未夠瘦。

到後來,我慢慢睇開左,知道人生唔係淨係得減肥,就漸漸放棄左嗰種自卑、過度勞役自己嘅修身方式。到後來去左美國、加拿大exchange,身形就打回原形,但我都睇開左,因為有更重要嘅事等住我去做。讀書、工作、社交等等,多姿多彩,我覺得無必要好似以前咁花太多精力,就係為左減肥而放棄生活中其他更重要嘅嘢。

2018年開始,特別係呢幾個月,我埋首工作同處理其他事務,有時忙起上黎,一個禮拜唔出街都試過😂 到左8月,我終於頂唔順,覺得自己唔可以再咁靜態,所以開始左八月運動大計,每個weekend 都做帶氧運動幾個鐘,而呢個星期開始,我日日都出去快步行+上落大樓梯,之前落雨跑少左,但平均每日都移動到7km同幾百級樓梯,唔係話好多,但對比起完全唔郁係好大進步,而且日日keep住做少少,加起來就會有好大嘅改變。
同以前唔同嘅係,我今次呢一波運動,唔再係喺巨大嘅修身壓力下進行,而係真係希望為自己培養良好嘅習慣,以及為身體健康著想。我無刻意監督住我嘅體重,但我發現好多好好嘅轉變,例如以前我焗桑拿都唔出汗,依家日日都出到汗;以前我行幾步樓梯都好攰,依家我行5/6層都未喘氣;依家訓覺熟左、精神都好左同集中左,情緒穩定左。好神奇,只係短短一個月,就有咁正面嘅轉變,真係好鼓舞,體重係點,原來真係唔係最重要嘅嘢。

出呢個post 係希望鼓勵大家一齊注意健康,同時比自己反思返 body positivity 對我嘅影響。由瘋狂厭惡自己而運動,變到放低憎恨唔再介意體型,變到依家開始為身體著想而運動,呢個過程唔係咁容易,都唔會就咁結束。我會繼續不斷學習同埋努力,希望大家都一齊吧😝