以前連登仔好鍾意一見到女就話係雞，一有 #metoo 就話人作故仔勞資糾紛，一係就話被性侵過好污糟送都唔要… 我好希望經過呢排港女 #metoo黑警，用慘痛嘅經歷喚醒香港大眾後，大家都可以反思下以往自己對待性暴力嘅態度，從玩味笑話，到評論，到偷拍，到非禮等，強暴文化係環環相扣，一脈相承，小可以見大，大可以見小。

————————————

因為太累，未有力寫自己嘅文字，不過地方的蕩婦 @tung.e.e 之前篇文基本上講得中我90%心聲，打唔到比佢，容我不問自取repost，大家都可以follow下佢：

事實係，你好難教曉一個仆街：喂，你唔好咁仆街啦

我成日覺得減少女人因為性而受傷害嘅長遠方法 ，係唔好令佢哋咁易因為自己身體而受覺得受傷害，唔好令佢哋咁易因為自己身體而覺得被侮辱。

被全裸搜身我都試過。

當然我好彩，我無畀人上下其手，無畀人上下打量、冷嘲熱諷，更無中門大開、畀男警喺門口說三道四。搜身室入面我除得好爽快，佢搜完一輪，然後我又懵盛盛著返好所有衫。

我事後意識到佢搜得極唔專業，例如同我一齊被搜身嘅人，就算有吸毒案底嘅 ，大部份都係掃下褲腳反下褲袋搜身就夠，得好少人畀人除到清，全無準則可言。

再加上睇返搜身指引，原來唔應該要人不必要裸體———應該除完衫，畀我著返衫，先再除褲，而唔係乜一次過要我除曬，無謂地將裸體長時間露於人前。

諗返起件事，我覺得offended，有覺得佢唔專業，而投訴無門，亦好谷氣。

我無辦法保証呢班高薪畜牲專業，但無視咗非必要情況下裸體搜身呢種所謂侮辱，我至少可以減少自己受嘅所謂傷害。呢種心靈武裝好重要。畢竟覺得你唔專業、覺得自己被冒犯、唔被尊重，同覺得被侮辱、覺得羞恥，係兩種唔同嘅情緒，我好慶幸自己filter走咗「感到被侮辱而羞恥」呢種心靈折磨。

提倡自行過濾傷害，唔係要怪責心靈受創嘅女仔敏感脆弱，亦唔係代表我認同警察侮辱女抗爭者嘅惡行。打個比喻，就例如我著曬全身防彈甲，警察近距離打我一槍催淚彈，我會瘀、會痛，但我唔會有生命危險，亦唔會當場皮開肉裂。我自己武裝去保護自己，過濾傷害，係我照顧自己嘅份內事，但警察近距離開槍仍然係十惡不赦嘅行為。

宜家我哋活喺喺一個大家同意覺得女性身體會被侵犯嘅文化入面，女人受到性侵犯嘅傷害係確切而真實嘅，用完全無需要嘅身體接觸、裸露去搞女人，企圖嚇退女示威者，真係仆街。

咁當然，呢個改變係漫長嘅事。我有我理想中嘅處世態度，但唔代表我要逼全世界女人脫離佢哋身處嘅現實，併棄佢哋自細長大嘅價值、強行要大家扮曬唔認得嗰堆擺明象徵傷害同侮辱嘅「侵犯動作」嚟硬啃我嗰套。

但長遠嚟睇 我都係希望大家對身體、對侮辱、對性嘅睇法有變，令對方嘅污糟攻擊手段變得無效。就算我知你零專業操守，我亦知你手段下流，企圖侵犯我身體，我會聲討你。但我亦會保護自己，過濾到你嘗試對我心靈造成嘅傷害。

面對用性嚟傷害你嘅文化，包括逼你裸體、屈你叫雞，信我，性解放係有效嘅防具

性解放唔係笠個豬咀著件甲，一分鐘就上到嘅裝。性解放要靠耳濡目染，要慢慢特破枷鎖，要幾個月甚至幾年先上到裝。我會繼續守好呢條戰線，繼續咦咦哦哦，喺度幫你個腦上裝。

我哋係港女，我哋係抗爭者，我哋唔驚你，我哋會繼續行出嚟

五大訴求 缺一不可
光復香港 時代革命