父親懷疑性侵親女案，女兒改口供令父親脫罪，之後警方又控告幾名親屬涉嫌威逼女兒改口供，案情峰迴路轉，亦再次引發社會討論性侵與誣告嘅問題。
、
點解網民咁鍾意檢討受害人？
Blame the victim/檢討受害人嘅心態，其實係源於一種腦部自我保護嘅防衛機制，寧願相信受害人是自找、有錯的，都不願面對呢個社會，或許真的不如自己想像中安全友善。因此，好多時性侵案件一經報導，好多網民就好急於侮辱受害人、擔心案件係誣告、害怕疑犯嘅聲譽受損。雖然用二次傷害他人來鞏固自己嘅安全感既無知亦可悲，但畢竟未必係惡意，不能完全怪罪佢地。然而explanation不是excuse，我地都只能夠努力宣揚，希望令多啲人慢慢改變到心態。
平均每1000宗性侵，先有一宗性侵誣告*
誣告當然係錯亦係有罪，但相比起性侵定罪嘅案件，單看數字，誣告嘅case的確係少之又少。網民真係唔需要攞住幾單誣告case，就黎渲染「所有性侵受害人乃至整個女性群體都係誣告軍團」嘅恐慌。又，膠中自有膠中膠，我發現大部分男性網民喺討論「誣告」問題嘅時候，都係講緊佢地就黎唔小心掂到女性，之後該女性個眼神令佢地覺得含冤😹 其實呢種玻璃心嘅程度不亞於佢地所鄙視嘅「視姦」控訴，眼神都係性騷擾vs眼神都係老屈😹
被告成功脫罪，姐係受害人誣告啦！
面對呢啲口吻，真係話你on9鍾意睇你嬲。其實一單案件能夠上庭受審，姐係至少表面證供成立，唔會完全係無中生有。當然，亦不代表被告必定有罪。我只係想解釋返比大家聽，即使被告脫罪，亦要看看該案件實況，並不一定代表佢「真係無做」，更加不能推演到「受害人誣告」。舉個實例：之前有單衰11案件，法庭已經有晒被告同多名初中生嘅自拍性愛照片影片，但啲初中生礙於面子、家人嘅反對、同學嘅壓力，唔肯出庭指證相中人係佢地。香港證據法要求好嚴謹的，事主唔上庭接受盤問的話，證據要求就未能達標，最後個被告甩左好多條罪。但脫罪了，又係咪代表被告無搞過小妹妹，甚至代表律政師誣告佢？
香港司法制度尚算完善，「寧縱毋枉」，刑事定罪嘅標準係很高的。咁樣係好事，但同時亦代表著，疑犯唔入罪，只係代表「不能完全肯定有犯罪」，但實際情況可能係「很大機會有犯罪」，只係未達到法庭標準…….總之，有排都未推到去受害一方/律政司誣告。一邊大喊誣告不要得，另一邊則先誣告受害人誣告，實在係自相矛盾。
「都未定罪，已經起曬底公審疑犯，佢就算係清白都一世玩完啦！」
一般大眾未審先判、網絡公審，喺網絡時代的確係嚴重。但呢個問題並不僅侷限於性侵案件，甚至不侷限於疑犯：多年來，就連性侵受害人，都會被討論區網民起底羞辱嘅時候，矛頭應該指向煽風點火、起底嘅網媒、網民、新聞媒體，仲有香港過時嘅私隱保障法律，而不是指向潛在嘅受害人企出黎。好似呂麗瑤事件咁，其實佢本人由始至終都無暴露教練姓名樣貌，係媒體同網民起底再傳開，何以佢又會背上誣告公審嘅罪名呢。又，如果真係誣告的話，法律上絕對可以懲處/追討的。
喺有些人眼中，世界係如此矛盾：呢個世界係完美嘅，受害人都係自找。然而，自找嘅原因係所有男人都係禽獸、強姦預備犯，所以女性不夠提防警惕，甚至意氣風發，被侵害了當然只能怪罪她而不能怪罪強姦預備軍團啦。但即使男人都是強姦預備軍，強姦都是不存在的，女性作出提防例如眼神凌厲、避開男性，都會令男性受傷，更是準備誣告的表現。由於女性都是誣告預備軍，疑犯入罪的話是冤枉、脫罪的話是誣告，沒有其他可能性。天啊，咩世界黎架，真希望呢啲人喺現實唔係大多數。
備註
數據統計有其限制，請參考《性罪行誣告 非如輿論形容普遍（文：蔡玉萍、黎苑姍）》
Emilia's Gender Blog 