多謝香港教育大學同關懷愛滋邀請我到課堂上做嘉賓,講關於青少女與性嘅議題,我喺分享中提到香港蕩婦羞辱(slut-shaming)嘅現象。

乜嘢係蕩婦羞辱?

社會以性吸引力衡量女性,同時又排斥展示性吸引力嘅女生。「蕩婦羞辱」唔係「羞辱蕩婦」咁簡單,而係不論該女性是否「蕩婦」,都用性、貞節黎羞辱佢,背後邏輯為女性的貞操是其最寶貴資產,目的除左係控制女性嘅性/私生活,更加會用作打擊女性嘅事業發展。

喺課堂中,我用左蔣麗芸黎做例子。我雖不認同佢嘅政見,但不難發現,有啲人攻擊蔣麗芸嘅時候,都會用性黎羞辱佢。例如話佢係「老雞」、「企喺廟街都唔值100」、「送比我都唔X」等等,即使蔣麗芸從無賣弄過風情。我又用李偲嫣做例子,不少反對李偲嫣政見嘅人,都會順道攻擊佢係雞,亦會描述佢外貌身材如何不吸引,彷彿佢嘅性吸引力,能夠影響佢政見嘅合理性。親,其實毫無關聯啊。

如果你本來就好「蕩」,例如衣著性感或舉止撩人,更加會遭到蕩婦羞辱。課堂上其中一個同學就分享左,當年佔領期間佢接受街訪,剛好佢著住背心,訪問出街後,受盡性方面嘅謾罵侮辱,有網民甚至對佢起底同言語性恐嚇,就只係因為佢著左一件背心。#重點明明係政見 #你就講人件背心同個胸

最弔詭嘅係,其實「蕩」嘅準則係無定向嘅。有人可以保守到覺得露樣露頭髮(某啲伊斯蘭教徒)已經好蕩,有人可以覺得裙及膝、短袖子都好蕩,有人可以覺得緊身衣服好蕩、有人可能不理剪裁總之某種顏色就好蕩……蕩嘅定義好大程度係 #徐李喜歡 的,即係龍門任搬,點都可以羞辱到人。前幾日同做政府嘅朋友食飯,佢先提到有個同事件包領白恤衫有條黑色花邊,已經有人閑話。

作為讀左15年女校嘅聖女😂,我好慶幸我校雖然保守,但未至於會壓迫粉碎女生(opps已經有師妹留言唔認同了🤪)。但係,坊間不少學校,都係從小灌輸女生「貞操至上、外表要緊」嘅觀念。學校居然有權 check 內衣顏色、check打底褲、嚴格要求女生穿累贅長裙、甚至在便服日、放學後都諸多規範女生,要求女生衣著「純潔」、「檢點」,否則就不是好女生,然後她整個人生就毀了。彷彿一套衣服就能改變其人格,咁我一日換24套衫,我咪精神分裂?😹 郭教授喺課堂上,提到佢女兒喺便服日被處分,原因係著左緊身長牛仔褲。諷刺地,其實條牛仔褲係教授借比個女嘅,難道連教授都係「失敗嘅女生」「不好嘅女生」? 衣著係自由、表達、創意、實用……而唔係人格顯示器,咁難明嗎?

可悲嘅係,被壓逼嘅女生長大後,又多數會變成壓逼年輕女生嘅大人,無限loop。

唔知幾時,香港先可以真正成為一個先進自由嘅城市,尊重所有人不論性別,作為人所擁有嘅自主同自由呢